Үнүп орар чаа чыл-биле!
Күске чыл
Күске-биле Теве ийи
Күштүг мѳѳрей кылган иргин:
Чырык хүннү баштай кѳрген
Чылга кирер болган иргин.
Дедир чүкче кѳрүнгештиң,
Теве кайгап, чыдып калган.
Күске ынчан мѳген кырлааш,
Хүннү баштай кѳрүвүткен
Ынчангаштың эң-не бирги
Ыдыктыг чыл Күске болган.
Улуг, биче эргилделер
Ужун база Күске баштаан.
Амыдырап база билир,
Айыыл-халап эндевес-даа.
Чогум боду уян-даа бол,
Чолу бедик амытан бо.
Баажыланчак, хыйланчак бол,
Пар чыл-биле таарышпас бол,
Улу, Мечи, Инек-биле
Улуг ѳңнүк амытан бо.
Хамык чылдар эгези боор
Күске чылды хүндүлээли.
Карыш четпес боттуг-даа бол,
Күчү ында, мѳгейээли!
Чаш, садик назылыг болгаш школачы уругларга шулуктер «Амыдырап оорениили», Кызыл — 2007 г.
Чооду Кара-Куске