Серен Байыровна Монгуш Өвүр районнуң «Кызыл тук» колхозунуң тудугжу бригаданың удуртукчузу.
Серен Байыровна чүгле эки күш-ажылчы тудугжу эвес, а харын үлегерлиг иелерниң бирээзи. Тудугжу эртенден кежээге чедир ажылдаар эң-не чымыштыг ажылчын болгай. Ынчалзажок Серен Байыровна уругларын өөредип кижизидериниң талазы-биле үе шакты черле тыпкан турар. Ооң улуг оглу Эрес-оол 10 классты дооскаш, Совет Армияга шериг албанын эрттирген, ам районнуң культура килдизинде ажылдап турар, а Чечен Барнаулдуң садыг техникумунуң сөөлгу курузунда, Мария Кызылдың башкы училищезиниң студентизи, Алёша, Зоя, Нина, Катя, Клара олар 1-ден 9 чедир класстарда багай эвес өөренип турарлар. Алдын-оол биле Клава ийи олар ажыл шагы эгелээри-биле иезиниң тудушканы, колхозтуң уруглар садынче четтинчипкеш базыптарлар.
Бистиң чуртувуста күш-ажыл кижини каастаар, күш-ажыл аас-кежиктиң үндезини, күш-ажыл хүндүткелдиң болгаш макталдың үндезини болгай. Бөдүүн ажыл-ишчи тыва херээжен тудугжунуң аныяк салгакчыларны кижизидеринге алдар-хавыяалыын, ооң бичии-даа бол үнелиг күш-ажылын Коммунистиг партия, Совет чазак бедии-биле үнелеп көргениниң тодаргай херечизи ооң хөрээнде чайыңнанып турар «Маадыр иениң сылдызы», «Күш-ажылчы эрес-маадырлыг чорук дээш» деп медаль болур. 1967 чылдың март 12-де Серен Байыровна Монгуш АССР-ниң Дээди Совединиң депутадынга соңгуткан (И. Келик-Сенги, номдан үзүндү).
Номдан чурук.
— Тываның алдарлыг херээженнери. – Редактор Сонам С.С. – Тываның ном үндүрер чери. – Кызыл-1967. — 87-90 арыннар.