Седип-оол Токпак-оолович Танов (декабрь 13, 1901 – 1986) 1901 чылдың декабрь 13-те Дзун-Хемчик кожууннуң Морзуктуг деп черге ядыы арат өг-бүлеге төрүттүнген. Тыва Улустуң революстуг шерииниң Бичии офицерлер училищезиниң доозукчузу, аныяк армейжилерге билиглерин дамчыдып чораан. Москвага өөренип тургаш, Коммунистиг ажылчыннарның университединге мергежилин эскертирген. Күш-ажылчы аныяк оол ТАРП-ның Политбюрозу кежигүнү болгаш Тувценкооптуң удуртукчулар чөвүлелиниң даргазы кылдыр соңгуткан. Ол үеде ооң кол сорулгазы Совет Эвилели-биле садыг-саарылга тургузары турган. Тывага революстуг болуушкуннарга киришкен.
Седип-оол Тановтуң 1931 чылда ССРЭ-ге ТАР-ның элчини кылдыр томуйлаттынганы шын болган. Москвага болгаш өске-даа хоорайларга кадрлар белеткээринге улуг үлүг-хуузун киирген. Седип-оол Токпак-оолович 1935 чылда ТАР-ның культура сайыды апарган. Тановтуң ТАР-ның культура сайыды турган үезинде Национал театр тургустунган, ооң удуртулгазы-биле чаа аттар дыңналып, Монгалби, Кара-кыс, Намдар, Өлзей-оол, Чыргал-оол дээш оон-даа өске сылдыстар Тывага төрүттүнген. Тыва Арат Республиканың культуразынга хувискаалдың дараазында базымы – тыва радиодамчыдылганың тургустунганы. Танов боду станцияның бирги дамчыдылгазын мындыг сөстер-биле ажыткан: «Бо дээрге Кызыл чугаалап турар-дыр! Бөгүн бистиң республикада улуг байырлал — Тыва радио дамчыдып эгелээн».
Седип-оол Танов аныяктарга үлегер болуп, школачылар болгаш студентилер-биле билиглерин үлежип, улуг салгалдың чаа амыдырал дээш канчаар демисежип чораанын сактыышкыннарын үлежип чораан. Хүндүлүг дыштанылгага-даа ажылдап чораан. Өг-бүлезинге Седип-оол Танов кезээде үлегерлиг өг-бүле баштаңчызы чораан, өг-бүлезиниң кежигүнү бүрүзүнге кичээнгейин, сагыш човаашкынын салып чораан.
Тыва Арат Республиканың, Кызыл Туктуң, Күш-ажылдың Кызыл Туктуң орденнери-биле, «Эрес-дидим күш-ажыл дээш» медаль-биле шаңнаткан. Ооң адын «ХХ вектиң Тываның хүндүлүг кижилери» деп номда бижээн.
«Кызыл хоорайның хүндүлүг хамаатызы» атты 1972 чылда тывыскан.