Ария Араптановна Алдын-оол 1928 чылдың февраль 29-та Бай-Тайга кожууннуң Улуг Ооруг деп черге төрүттүнген. Башкы стажы — 65 чыл. Чеди классты дооскаш, 1945 чылдан тура кылып келген ажылы-ла ол турган – башкылаар. Ол школаның үргүлчү тургустунган программадан үнгеш, шинчилелдерни чорудуп, чаңчылчаан школалардан хүлээп албаан улусту хүлээп ап, кижизидилге ажылын бижик-билигге өөредири-биле чарылбас деп санап турган. Ооң өөредиин муң-муң тыва оолдар, уруглар эрткен.
Хөй чылдарда Тээлиге, Кызыл-Мажалыкка, Шуйга, Кызылга эге класстар башкылап ажылдап чораан. Кызылдың №2 школазынга уругларны өөредип тургаш, шенелде башкызы база бирги класска төрээн дыл (Үжүглел) болгаш номчулгага өөредилге-методиктиг комплекстиң тургузукчузу болган. Кызылдың күрүнениң педагогика институдунга эге өөредилге факультединиң төрээн дыл методиказы кафедразынга башкылап ажылдап чораан. Ол 20 чыл дургузунда Башкылар белеткээр институдунуң башкылар белеткээр курстарынга долу эвес башкылап чораан. Методиктиг чаартылгаларның хөй кезиин Ария Араптановна класстарынга өөредип эртирип шенеп көргеш, ооң соонда бүгү республиканың школаларынче киирген. Ария Алдын-оолдуң педагогиктиг кредозу – уругларга бедик шынарлыг өөредилгени бээри: математика кичээлдеринге, хамык чүвениң мурнунда, угаан-медерелиниң арга-дуржулгазын, сактып алырын, бот-тускайлаң боданыышкынны болгаш ажылды сайзырадыры; төрээн дыл кичээлдеринге дылга ынакшылды оттуруп, литературлуг аас болгаш бижимел чугаазын сайзырадыр.
Ол бирги класстың эге школазынга «Азбука номунуң» автору база ооң «Бижимел» деп номунуң автору. Ол ышкаш «Бирги класстың эге школазынга тыва дыл кичээлдериниң планнары» деп чыындының, «Диктант чыындызы», «Чогаадыглар чыындызы», «Бодуң номчу» деп өөредилге пособиелериниң, «Үжүк-бижик кичээлдери», «Дисциплинаны кижизидери» деп методиктиг пособиелерниң болгаш өске-даа хөй-хөй методиктиг ажылдарның автору.
«ССРЭ-ниң Улустуң башкызы», «РСФСР-ниң школазының алдарлыг башкызы», «Башкы-методист» аттарны тывыскан, «Тыва Республиканың «Хүндүлел демдээ» ордени, «Эрес-дидим күш-ажыл дээш Херечилел»-биле шаңнаткан турган.
«Кызыл хоорайның хүндүлүг хамаатызы» атты 1998 чылдың март 6-да тывыскан.
А.А. Алдын-оолдуң чуруу ажык үндезиннерден.