Соян Алдын-Херел – тыва эки турачы. Алдын-Херелдиң адазы – Соян Минчимааның алыс чурту Эрзиннинң Тере-Хөл. 1919 чылда Алдын-Херел аңаа төрүттүнген.
Алдын-Херел Дөңгүр-оол уруу Чанчымаа-биле өгленген-ле бир чыл чедип чорда, Ада-чурт улуг ССРЭ-же гитлержи аг-шериг оор ёзу-биле халдаан. Дайынның эң-не кадыг-дошкун чылы 1941 чылдың күзүнүнде Кызыл-Чыраа сумузундан чаңгыс чер чуртуглары Соян Дончун, Чооду Күрседи олар-биле Тес-Хемге организастаан шериг кезээнге албан эрттирип келген. Дайын уезиниң кадыг-бергезинге каңналып быжыкканын көргеш, бедик сагылга-чурумнуг, эң эки өөредилгези дээш Соян Алдын-Херелди ТАРН-га хүлээп алган.
Улуг лейтенант Оюн Оолактың взводунга Ковров хоорайга түр белеткелдиң-даа үезинде, Снегирёвкадан Ровно областың девискээринге чедир кадыг-берге походтарга Соян Алдын-Херел партийжи быжыг туруштуун, спортчунуң каңналган мөзү-шынарын көргүскен. Ровнодан Дубно чедир шаап халдаашкыннарга, сегиржип алыышкыннарга эрес-маадырлыг чоруун көргүскени дээш дайынчының эң бедик шаңналы болур Алдар ордениниң III чергези-биле шаңнаткан.
«Эки турачы аъттыг эскадрон». – М.Б. Сундуй. — Сактыышкыннары. — Тываның ном үндүрер чери. — Кызыл — 1989. – арыннар 119-120.
Фотография НА РТ, ф. 116, оп. 1, д. 12 л. 8.